विराटनगर, २५ पुष । विराटनगर–३ का बासिन्दाले स्थानीय पुष्पलालचोकमा चक्काजाम गरेका छन ।
उनीहरुले चोकको सडक निर्माण नगरिएका कारण सर्वसाधारण र सवारी चालकले सास्ती झेल्नुपरेको भन्दै चक्काजाम गरेका हुन् । स्थानीय बासिन्दाले पुष्पलालचोकको चारैतर्फ बाँसले घेरेर यातायात आवागमनमा अवरोध गरेका हुन् । मुख्य चोकमै बाँस तेस्र्याएर अवरोध गरिएका कारण सवारीसाधनहरु बाटोमै रोकिएका छन् । स्थानीय किशोर भट्टराईले मुख्यचोकको सडक निर्माण नगरिएका कारण दैनिक दुर्घटना हुने गरेको र सडक छेउका बासिन्दालाई धुलोको समस्या झेल्नुपरेको बताउनुभयो । विराटनगर महानगरपालिकाको वडानम्बर १९ र विराटचोकतर्फ जानसमेत छोटो पर्ने भएकाले सो सडक अत्यधिक ब्यस्त रहने गर्दछ । चोकमै अवरोध गरिएका कारण टाढाटाढाबाट आएका सर्वसाधारणलाई समस्या भएको छ ।
