कास्की क्षेत्र नम्बर २ बाट निर्वाचित प्रतिनिधिसभा सांसद विद्या भट्टराईले जनतासँग गरेका वाचाहरु आफ्नो कार्यकालमा पूरा गर्ने प्रतिवद्धता जनाउनुभएको छ ।
संसद सचिवालयमा सपथग्रहणपछि पत्रकारहरुसँग कुरा गर्दै उहाँले संविधानले निदृष्ट गरेअनुसार संसदमा आफ्नो भूमिका रहने भन्दै तीन वर्षमा नीति निर्माण र विकास निर्माणका कामहरु पूरा गर्ने प्रतिवद्धता जनाउनुभयो । उहाँले पाँच वर्षका लागि भएको निर्वाचनमा २ वर्षपछि उपनिर्वाचन भएको र अब बाँकी तीन वर्षको अवधिमा पहिलो नीति निर्माणमा भूमिका खेल्ने बताउनुभयो । यस्तै दोस्रो विकास निर्माणमा अपूर्ण रहेका कामहरु पूरा गर्ने उहाँले बताउनुभयो । मंसिर १४ गते भएको उपनिर्वाचनमा विजयी हुनुभएका भट्टराईलाई उपसभामुख शिवमाया तुम्बाहाम्फेले पद तथा गोपनियताको सपथ गराउनुभएको हो । उपनिर्वाचनमा उहाँले २४ हजार ३९४ मत ल्याउनुभएको थियो ।
