मृगौला पिडितहरुले आफुहरुलाई उपलब्ध गराउँदै आएको सम्पुर्ण सहयोग पुर्ववत ढंगले उपलब्ध गराउन माग गर्दै प्रधानमन्त्री निवास बालुवाटारमा प्रदर्शन गरेका छन् ।
मृगौला पिडित सरोकार समाजको नेतृत्वमा आज बालुवाटार पुगेका पिडितहरुले जिविकोपार्जन वापतको मासिक भत्ता र डायलासिसमा दिदै आएको सुविधा यथावत राख्न माग गरेका हुन् । १४ बुँदे ज्ञापनपत्र लिएर बालुवाटार पुगेका पीडीतहरु प्रधानमन्त्रीसंग भेट्न नपाएपछि रुष्ट बनेका थिए । प्रधानमन्त्री स्वयम् मृगौला पिडित भएर पनि आफुहरुको समस्या नबुझेको भन्दै उनीहरुले आन्दोलन गर्ने चेतावनी नै दिए । प्रधानमन्त्रीले भेट्ने समय नदिएको भन्दै मृगौला पिडितहरुले आन्दोलनको घोषणा गरेका हुन् । आफुले निजी अस्पतालमा उपचार गराएर राज्यको ढुकुटी सकेको तर पीडीतका लागि सामान्य सुविधा पनि कटौती गरेको भन्दै उनीहरुले प्रधानमन्त्री प्रति आक्रोश पोखे । पीडीतहरुले जीविकोपार्जनबापतको मासिक भत्ता ५ हजार उपलब्ध गराउनुपर्ने, निःशुल्क हेमोडाइलाइसिस, विरामी कुरुवाको उचित बसोबासको व्यवस्था, डाययलासिस सुविधाको रकम तत्काल उपलब्ध गराउनुपर्ने लगायत १४ बुँदे माग गरेका छन् । उनीहरुले माग सम्बोधन नभए जस्तोसुकै आन्दोलन गर्न तयार रहेको बताए ।
प्रधानमन्त्रीसँग भेट गर्न नपाएपछि पीडितहरु बालुवाटारबाट नाराबाजी गर्दै माईतीघरमण्डलासम्म पुगेका थिए । उनीहरुले मण्डलामा पनि केही समय प्रर्दशन गरेका थिए ।
