भेनेजुएलाका विपक्षी नेता हुँवा गुवाइदोले देशमा गृहयुद्ध निम्तिने राष्ट्रपति निकोलस मादुरोको चेतावनीलाई खण्डन गर्नुभएको छ । गुवाइदोले गृहयुद्धको कल्पना गर्नु हाँस्यास्पद भएको टिप्पणीसमेत गर्नुभएको छ । यसअघि राष्ट्रपति मादुरोले अमेरिकालगायतका देशले गुवाइदोलाई उकासेको भन्दै राजनीतिक संकट कायमै रहेमा गृहयुद्ध हुने चेतावनी दिनुभएको थियो । यसैबीच युरोपियन युनियनले भेनेजुयलाका विपक्षी नेता गुवाइदोलाई नै अन्तरिम राष्ट्रपतिको मान्यता दिएको छ । बेलायत र इयुमा आवद्ध देश जर्मनी, फ्रान्स, डेनमार्क, अस्ट्रिया, स्वीडेन, स्पेनलगायतले आफूलाई राष्ट्रपति घोषित गरेका गुवाइदोलाई अर्को चुनाव नहुन्जेलसम्मका लागि अन्तरिम राष्ट्रपतिको मान्यता दिएका हुन् । इयूले यसअघि राष्ट्रपति निकोलस मादुरोलाई नयाँ निर्वाचनको मिति घोषणा गर्न आइतबारसम्मको समय दिएको थियो । आफूलाई अन्तरिम राष्ट्रपति घोषित गरेका गुवाइदोलाई अमेरिकाले तत्काल समर्थन गरेको थियो । त्यसलगत्तै क्यानडा, ब्राजिल, अर्जेन्टिना र कोलम्बियालगायतका दक्षिण अमेरिकी देशले पनि गुवाइदोलाई मान्यता दिएका थिए । राष्ट्रपति निकोलस मदुरोलाई भने रुस र चीनले साथ दिएका छन् । राजनीतिक संकट गहिरिँदै गएपछि भेनेजुएलामा आर्थिक संकट चुलिएको छ ।