बंगलादेशका राष्ट्रपति मोहमद अब्दुल हमिद नेपाल भ्रमण सकेर स्वदेश फर्कनुभएको छ ।
बंगलादेशका राष्ट्रपति हमिद नेपालको चार दिने भ्रमण सकेर आज अपरान्ह स्वदेश फर्कनुभएको हो । उहाँलाई त्रिभुवन अन्तराष्ट्रिय विमानस्थलमा राष्ट्रपति विद्यादेवी भण्डारीले विदाई गर्नुभएको हो । उहाँलाई विदाई गर्न गृहमन्त्री रामबहादुर थापा बादल, परराष्ट्रमन्त्री प्रदीप ज्ञवाली लगायत मन्त्रीहरु विमानस्थल पुगेका थिए । त्यसैगरी उच्चपदस्थ अधिकारीहरु पनि विदाईमा सहभागी भएका थिए । राष्ट्रपति हमिदको विदाईको अवसरमा अन्तराष्ट्रिय विमानस्थलमा नेपाली सेनाले सलामी अर्पण गरेको थियो ।
मंगलबार नेपाल भ्रमणका लागि काठमाडौ आएका राष्ट्रपति हमिदले बुधबार समकक्षी राष्टपति विद्यादेवी भण्डारी, प्रधानमन्त्री केपी शर्मा ओली लगायत संग उच्चस्तरीय राजनीतिक भेटघाट गर्नुभएको थियो । त्यसैगरी उहाँले विहिबार पर्यटकियनगरी पोखराको अवलोकन भ्रमण गर्नुभएको थियो भने मंगलबार नै भक्तपुर दरबार क्षेत्रको अवलोकन भ्रमण गर्नु भएको थियो । शुक्रबार बिहान चन्द्रागिरी हिल्स अवलोकन गर्ने कार्यक्रम राखिए पनि अन्तिम समयमा स्थगित गरिएको थियो ।
