दोस्रो संस्करणको पोखरा प्रिमियर लिग (पीपीएल) अन्तर्गत आज भएको पहिलो खेलमा एक्सपर्ट धनगढीले विराटनगर टाइटन्सलाई ५ रनले हराएको छ ।
टस हारेर पहिले ब्याटिङ गरेको धनगढीले निर्धारित २० ओभरमा ८ विकेट गुमाउँदै १ सय १७ रन बनाएको थियो । धनगढीका लागि कमलसिंह ऐरीले सर्वाधिक २६ रन बनाए । बलिङतर्फ विराटनगरका लागि साहब आलमले तीन तथा नोमान खानले दुई विकेट लिए । १ सय १८ रनको सामान्य लक्ष्य पछ्याएर मैदानमा उत्रिएको विराटनगर निर्धारित ओभरमा ९ विकेट गुमाउँदै १ सय १२ रनमा सीमित भएको थियो । विराटनगरका लागि राजु रिजालले सर्वाधिक २५ रन बनाए । त्यस्तै सुनिल धमलाले १८ तथा पुनित मेहराले १५ रन जोडे । बलिङतर्फ धनगढीका लागि दीपेन्द्रसिंह ऐरीले ३ विकेट हात पारे । आजको दोस्रो खेलमा काठमाण्डौ गोल्डेन्स वारियर्स र बुटवल ब्लास्टर्स खेलिरहेका छन् । बुटवलले टस जितेर पहिला बलिङ गर्ने निर्णय गरेको छ ।
