विभाग गठन, नेविसंघ लगायतमा भागवण्डा नमिल्दा आन्तरिक किचलोमै फसिरहेको कांग्रेस केन्द्रीय कार्यसमिति बैठक आज पनि स्थगित भएको छ ।

विवादित विषयमा संस्थापन र इतरपक्षबीच सहमति हुन नसकेपछि बैठक चौथो पटक स्थगित भएको हो । गत मंसिर २६ गतेबाट सुरु बैठकमा सभापति शेरबहादुर देउवाले प्रस्तुत गर्नुभएको ९ वटा एजेण्डाका अधिकांश बुँदामा असहमति जनाउँदै संस्थापन इतरपक्षले बैठक बहिस्कार गर्दै आएको छ । ललितपुरको सानेपास्थित पार्टी केन्द्रीय कार्यलयमा अपरान्ह १ वजेका लागि बोलाईएको बैठक आन्तरिक गृहकार्य नपुगेको भन्दै भोली सम्मकालागि स्थगित भएको मुख्यसचिव कृष्णप्रसाद पौडेलद्वारा जारी विज्ञप्तिमा उल्लेख छ । सभापति देउवाले आफुखुशी विभाग गठन, भातृ संस्थाको नेतृत्व लिन खोजेको भन्दै इतरपक्षले महाधिवेशन कार्ययोजना माग गर्दै आएको छ । केही विषयमा सहमति नजिक पुगे पनि विभाग गठन, नेविसंघको भागवण्डा लगायतका विषयमा कुरा मिल्न नसकेको संस्थापन इतर पक्षका नेता हृदयराम थानीले बताउनुभयो । पार्टीको १४ औँ महाधिवेशनको कार्यतालिका नल्याएको, सहमतिबिना विभागका संख्या २८ बाट बढाएर ४१ पुर्याउने प्रस्ताव बैठकमा पेस गरेको, भ्रातृसंस्था नेपाल विद्यार्थी संघ र तरुण दलमा देखिएको विवाद समाधानको ठोस प्रस्ताव नल्याएको भन्दै वरिष्ठ नेता रामचन्द्र पौडेल पक्षले असहमति राख्दै आएको छ । संस्थापन पक्षले भने पार्टीमा जारी आन्तरिक विवाद समाधानका लागि महामन्त्रीको संस्था बढाउने प्रस्ताव गरेको जनाएको छ ।