समाजवादी पार्टीका अध्यक्ष उपेन्द्र यादवले कानुन, न्याय तथा संसदीय मामिला मन्त्रालयको जिम्मेवारी सम्हाल्नुभएको छ ।
आज सिंहदबारमा पुगेर उहाँले सो मन्त्रालयको पदभार ग्रहण गर्नुभएको हो । त्यस अवसरमा उहाँले आफूलाई प्रधानमन्त्रीले अघि बढी नै माया गरेर सो मन्त्रालयमा पठाएको प्रतिक्रिया दिनुभयो । प्रधानमन्त्री केपी ओलीले मन्त्रीपरिषद पुनर्गठन गर्दा उहाँलाई स्वास्थ्य तथा जनसंख्या मन्त्रालयबाट कानुन, न्याय तथा संसदीय मामिला मन्त्रालयको जिम्मेवारी दिनुभएको थियो । सोही जिम्मेवारी ग्रहण गर्दै उहाँले त्यसलाई आफूले सामान्य रुपमा लिएको बताउनुभयो । प्रधानमन्त्रीले तपाईसँग परामर्शसमेत नगरी मन्त्रालयको जिम्मेवारी परिवर्तन गर्नु भो नि ? भन्ने संचारकर्मीहरुको जिज्ञासाको जवाफ दिने क्रममा उपप्रधानमन्त्रीसमेत रहनु भएका यादवले प्रधानमन्त्रीले सो विषयमा परामर्श गरिराख्नु नपर्ने पनि स्मरण गराउनु भयो । प्रधानमन्त्रीले आफूलाई अझ बढि अनुभवी होस्, धेरै मन्त्रालको अनुभव होस् भनेर अलि बढि नै माया गरेर सो मन्त्रालयको जिम्मेवारी दिएको हुन सक्ने पनि मन्त्री यादवको भनाइ छ ।
यसैबीच, मन्त्री यादवले अझै राम्रोसँग कार्यसम्पादन गर्न मन्त्रालयका कर्मचारीहरुलाई निर्देशन दिनुभयो । उहाँले कुनै पनि समस्या आफूसँग निशंकोच राख्न पनि मातहतका सबै कर्मचारीलाई सचेत गराउनुभयो । मन्त्रालयमा काम गर्ने क्रममा देखिएका कुनै पनि समस्या समाधानका लागि सचिवमार्फत आफू कहाँ आउँदा उपयुक्त हुने उहाँको भनाइ थियो ।
