सुनसरीको इटहरीस्थित जनता क्याम्पसका विद्यार्थीहरु क्याम्पस प्रशासनविरुद्ध आन्दोलित भएका छन् ।
आज क्याम्पसको मैदानमा धार्मिक कार्यक्रम गर्न दिएर पठन पाठन अवरुद्ध पारेको भन्दै विरोधमा उत्रिएका विद्यार्थीलाई प्रहरीले पक्राउ गरेको विरोधमा क्याम्पसका विद्यार्थीहरु आन्दोलित भएका हुन् । उनीहरुले क्याम्पस व्यवस्थापन समितीका अध्यक्षसहित पाँच जनालाई क्याम्पस प्रवेशमा निषेध गरेको घोषणा गरेका छन् । विद्यार्थीहरुले बिज्ञप्ति जारी गर्दै क्याम्पस व्यवस्थापन समितिका अध्यक्ष रेवतीरमण भण्डारी, क्याम्पस प्रमुख भोजराज श्रेष्ठ, सहायक क्याम्पस प्रमुख गीता अधिकारी, टोलनाथ काफ्ले र युवराज सिटौलालाई क्याम्पस प्रवेशमा निषेध गरेको उल्लेख गरेका छन् । आइतबार क्याम्पसको खेल मैदानमा क्रिश्चियन धर्मसम्बन्धि कार्यक्रमका लागि अनुमति दिएर बिद्यार्थीहरुको पठनपाठनमा समस्या देखिएको भन्दै बिद्यार्थी नेताहरु विरोधमा उत्रिएका थिए । मुख्यमन्त्री सहभागि हुने कार्यक्रममा अवरोध गर्न खोजेको भन्दै प्रहरीले केही विद्यार्थीलाई नियन्त्रणमा लिएर बेलुका छाडेको थियो । क्याम्पसको खेल मैदानमा क्रिश्चियन धर्मसम्बन्धि कार्यक्रमका लागि अनुमति दिएर विद्यार्थीहरुको पठनपाठनमा समस्या ल्याउनु ज्यादै आपत्तिजनक भएको विद्यार्थीहरुको भनाइ छ ।
बिद्यार्थीहरु पाँच घण्टासम्म हिरासतमा रहँदा क्याम्पस प्रशासनले कुनै प्रतिक्रिया नदेखाएको भन्दै समितीका पाँच जनालाई क्याम्पस प्रवेशमा निषेध गरिएको विज्ञप्तीमा उल्लेख गरिएको छ ।
