अमेरिकाको मिजुरी राज्यमा मंगलबार भएको सवारी दुर्घटनामा विराटनगरस्थित मुनालपथका एकै परिवारका तीन जनाको मृत्यु भएको छ ।
मृत्यु हुनेमा श्रद्धा खनाल ओझा, उनका बुबा गोविन्द खनाल र आमा शान्ता खनाल रहेका छन् । मृतक गोविन्द र शान्ता घुम्न छोरी ज्वाईंकोमा अमेरिकास्थित मिजुरी गएका थिए । दुर्घटनामा कार चालक श्रद्धाका पति प्रभाश ओझा र उनका ४ वर्षीय छोरा घाइते छन् । प्रभाशको अवस्था खतरामुक्त छ भने बालकको अवस्था चिन्ताजनक छ । गाडी बाटोमा रोकेको बेला पछाडीबाट ट्रकले हानेको बताइएको छ । श्रद्धा र प्रभाश अगाडी सिटमा र बुबा आमा र नानी पछाडीको सिटमा थिए । गोविन्दलाई घटनास्थलमा, तथा श्रद्धा र आमा शान्तालाई अस्पतालमा मृत घोषित गरिएको थियो । विराटनगर मुनालपथस्थित खनाल परिवार अहिले शोकमा डुबेको छ ।