विराटनगरमा आज बिहान भएको सडक दुर्घटनामा एक महिलाको मृत्यु भएको छ भने दुईजना घाइते भएका छन । भारतीय नम्बर प्लेटको ट्रकले को ५ प ३२०० नम्बरको मोटरसाइकललाई ठक्कर दिंदा मोटरसाइकलमा सवार रंगेली नगरपालिका वडानम्बर ७ की ३० वर्षीया आँशु अग्रवालको मृत्यु भएको हो । सोही मोटरसाइकलमा सवार मृतकका श्रीमान ३८ वर्षीय मनोज अग्रवाल र ६ वर्षीया छोरी अनिशा अग्रवाल घाइते भएका छन् । उनीहरुको विराटनगरकै सप्तकोशी नर्सिङ होममा उपचार भइरहेको छ । बसपार्क दक्षिण कलेज रोड मोडको भित्री बाटोबाट हाइवेतर्फ आउँदै गरेको मोटरसाइकललाई विराटनगरबाट जोगबनीतर्फ जाँदै गरेको भारतीय नम्बर प्लेटको ट्रकले ठक्कर दिएको थियो । ठक्करका कारण आँशुको घटनास्थलमै मृत्यु भएको थियो भने उनका श्रीमान र छोरी घाइते भएका छन् । ठक्कर दिने एन आर ५५ एल १४१९ नम्बरको ट्रक र चालक भारत अलिगढका ३० वर्षीय कमल सिंहलाई प्रहरीले नियन्त्रणमा लिएको जिल्ला ट्राफिक प्रहरी कार्यालय मोरङका प्रमुख शिव पोखरेलले जानकारी दिनुभयो ।