नेदरल्याण्ड्स यूईएफए नेसन्स लिगको सेमिफाइनलमा प्रवेश गरेको छ । गएराति भएको खेलमा जर्मनीलाई २–२ गोलको बराबरीमा रोक्दै नेदरल्याण्ड्स अन्तिम चारमा प्रवेश गरेको हो । जर्मनीले लिएको पहिलो हाफको दुई गोलको अग्रतामा भर्जिल भान डिक र क्वीन्सी प्रोम्सले अन्तिम पाँच मिनेटमा गोल गरेपछि नेदरल्याण्ड्सले अन्तिम चारको यात्रा तय गरेको हो । पहिलो २० मिनेटभित्र जर्मनीले दुई गोल गरेको थियो । जर्मनीका टिमो वेर्नर र लेरोई सानेले गोल गरे । ८५ औं मिनेटसम्म जर्मनीले दुई गोलको अग्रता कायम राख्यो । तर ८५ औं मिनेटमा प्रोम्सले गोल गर्दै नेदरल्याण्ड्सलाई खेलमा फर्काए । ९० औं मिनेटमा भान डिकले गोल गरेपछि खेल बराबरीमा पुग्यो । बराबरीसँगै लिग एको समूह एकबाट शीर्ष स्थानमा रहँदै नेदरल्याण्ड्स सेमिफाइनलमा पुग्यो । उसले चार खेलबाट सात अंक बनाएको छ । समान अंक भएपछि गोल अन्तरका आधारमा पछि पर्दै फ्रान्स दोस्रो स्थानमा रह्यो । चार खेलबाट २ अंक जोडेको जर्मनी भने रेलिगेसनमा परेको छ ।