सप्तरीको भारदह–राजविराज सडकखण्ड अन्तर्गत कंकालिनी हनुमाननगर नगरपालिका १० स्थित इनरवामा गएराति तिर्थयात्री बोकेको बस दुर्घटना हुँदा पाँच जनाको मृत्यु भएको छ । दुर्घटनामा अन्य २२ जना घाइते भएका छन् । धरानको बराहक्षेत्रबाट तिर्थ गरेर सप्तरीको डाकनेश्वरी नगरपालिकास्थित भूतही फर्किदै गर्दा बस अनियन्त्रित भई सडक छेउमा रहेको पोखरीमा डुबेको हो । दुर्घटनामा बसमा सवार डाकनेश्वरी ११ की ६० वर्षिया वेचनीदेवी यादव, ६५ वर्षिया ठकनीदेवी यादव, ७० वर्षिया सिकिलदेवी साह तथा दिनेश रजक र उनकी श्रीमतीको मृत्यु भएको प्रहरी उपरिक्षक राजेन्द्र विष्टले जानकारी दिनुभयो । गम्भीर घाईते ६ जनालाई थप उपचारकालागि धरान रेफर गरिएको छ । बाँकीको स्थानीय गजेन्द्रनारायण सिंह सगमाथा अंचल अस्पतालमै उपचार भइरहेको प्रहरीले जनाएको छ । क्षमता भन्दा बढी यात्रु बोकेको को १ ख २७९९ नम्बरको छिन्नमस्ता माँ भगवती ट्राभल्स नामक बस सडक छेउमा रहेको पोखरीमा खसेर दुर्घटना भएको थियो ।