इलामबाट झापातर्फ आइरहेको जिपको ठक्करबाट आज विहान एक साइकलयात्रीको मृत्यु भएको छ, भने अन्य तीन जना घाइते भएका छन् । मेची राजमार्ग अन्तरगत झापाको मेचीनगर १३ स्थित कालीझोडा भन्ने स्थानमा इलामबाट झापातर्फ आइरहेको मे १ ज २४६२ नम्बरको जिपले साइकलयात्रीलाई ठक्कर दिएको थियो । जिपको ठक्करबाट अर्जुनधारा नगरपालिका ५ निवासी ६० बर्षिय बिष्णुप्रसाद विकको मृत्यु भएको जिल्ला ट्राफिक प्रहरी कार्यालय बिर्तामोडका प्रहरी निरीक्षक राजेश राईले जानकारी दिनुभयो । उहाँका अनुसार जिपले साइकलयात्री विकलाई ठक्कर दिई जिप अनियन्त्रित भई बाटैमा उभिरहेका अर्का साइकलयात्री मेचीनगर १२का टंक रोक्कालाई ठक्कर दिएको थियो । साइकलयात्रीलाई ठक्कर दिएपछि जिप पल्टिदाँ जिपमा सवार इलाम नगरपालिका ७ निवासी विजेन्द्र रिजाल र सोही जिल्ला जोगमाई ४ का बिशाल सापकोटा घाइते भएका छन् । घाइते चारै जनालाई बिर्तामोडस्थित बिएण्डसी हस्पिटलमा लगिएपनि साइकलयात्री विकको उपचारको क्रममै मृत्यु भएको प्रहरी निरीक्षक राईले बताउनुभयो । दुर्घटनापछि जिप चालक भने फरार रहेका छन ।