कार्तिक, ३० । वायन रोनीको बिदाइ खेलमा इंग्ल्यान्डले अमेरिकालाई ३–० गोलअन्तरले पराजित गरेको छ ।
गएराति भएको अन्तर्राष्ट्रिय मैत्रिपूर्ण खेलमा इंग्ल्यान्डले अमेरिकालाई सहज रुपमा पराजित गरेको हो । जितसँगै इंग्ल्यान्डले रोनीलाई अन्तर्राष्ट्रिय फुटबल करिअरबाट सुखद बिदाइ गरेको छ । इंग्ल्यान्डकालागि एकसय २० क्याप खेलेका रोनी सर्वाधिक गोलकर्ता पनि हुन् । रोनी खेलको ५८ औं मिनेटमा मैदानमा प्रवेश गरेका थिए । उनी जोसे लिंगार्डको स्थानमा मैदानमा छिरे पनि गोल भने गर्न सकेनन् । तर, उनको टिम इंग्ल्यान्डले भने यूएसएलाई ३ गोल गर्न सफल भयो । इंग्ल्यान्डका लागि लिंगार्ड, एलेक्जेन्डर एर्नोल्ड र विलसनले गोल गरे ।
